POESIE

Rosetta Boniforti

Al Nostar Funtanin

di Rosetta Boniforti

Chi a quatar pass ghe la Casinèta
in due ca ghe nasü la mia mameta.
Evan növ fradei tra tusan e fiö
fevan vundas cunt al pa' e la mam
ed evan sempar pien da fam.

Ma la necesità la gusa l'ingegn
e ala sira vignevan al fontanin
cunt un bel redin,
al metevan gio in sula riva ala surgent
e ala matina prest al tirevan sü
pien da gambarit rosa
e da pesit d'argent!

A ca gheva la padèla bela sbruienta
prunta da fai rustì
e cunt una fèta da pulenta per ün
a ringrazievan al Signur
e quela sì leva una bela culaziun!
Se po' gheva anca un gutin da vin
altar che la briosch col capuccin.

E quand sevi una tusa mi
alla dumeniga da basura cunt i tusan
dal'uratori e la suora Superiura
vignevum al funtanin a catà i viör
a cur su e giò dala surgent
cantevum e sevum tucc cuntent,
alura gheva no pericul
da incuntrà i malvivent!

Ala sira però quei puse baloss
vignevan a passeggià al chiaro di luna
e al funtanin al diventeva la Costa Azzura.
Mi però ca sevi no tropa balosa, ala sira
sum mai vignü, ma al dì dopo ma disevan
"oh Rusèta sa ta ghe perdü!"

Po', va tola ti ma le restà
al funtanin pù nisun ga pensaa.
Ma un bel dì quei dal Prisma e i casciadur
in dal parlà s'in domandà.
"Ma al funtanin che fin la fa?"
Insema cun bona vuluntà sin metu dre a cercà,
a scavà, e a netà, en trua dal tütt, copertoni,
rifuiti, ruedigh, gramegna, rubin ingarbia
insema al'edera, ma ala fin l'en trua
e la surgent le risuscitaa.

En lauraa un po' tucc e guarda
che meraviglia ch'en metu chi,
certo ghe vürü un bel po' da danè
dal Cumun, dala Pruincia, e la Regiün
che ala fin, o gent, ghi metum anca mò nünch!
|
E se in quest'an la ma dumandarà
cala sbefarda d'una solita zabèta:
"In due ca ta ve a fa i feri o Rusèta?"
Go la risposta prunta.
"A vò in Costa Azzura
cun la mia neudina, insema ad altra gent,
a rimirà al funtanin
che in dala sua surgent
ghe riturnà a sguisà
i gambaritt rosa e tanti pesit d'argent!

Din don dan...Din don dan...

Ghe rivà i campan, ghe rivà i campan;

evan tutt incatramà

i èn purtà via da lustrà,

ades ìn una belesa da guardà.

Darlin darlen...Darlin darlen...

Ga sona la campanela de la Santa Teresina

La mà dumanda par cunfessas;

 ga vegn Pasqua e Natal

e da tutt i pecà em da liberàs.

Don...Don...Don...

Ga  sona la quarta, le da la Maria Dolente;

in i dun, ghe mort un quei ghidun,

disemig un requiem;

e quand sunarèn anca par mi

da  requiem diseman tri.

Din don dan...Din don dan...

Sent che cuncert, sonan tutt'insema,

inscì sonan nonca in Dom.

Lè  festa, lè Natal

Dunet,  metè dentar al capun in dal caldar.

Tirem su i òcc, guardem i nostar campan

A sbarlusisan lè una belésa da vidè!

E gent...demas da fa,

parchè ghi em anca da pagà.

di Rosetta Boniforti

* * *

Al lunedì cun la mia mama

andevi al mercà da Rho, sì,

gheva i bancarei pien da caramei,

ma mi pudevi pu da rivà

in piaza San Vitur,

par vide la funtana che cunt al sù,

la brileva e la feva tanti culur.

E quant turnevi indre

Rho - Pregnana a pe, i me òcc

brilevan e pensevi a la funtana,

<<O mama, chisà quand la faren

anca a Pregnana!!>>

Una bela funtanela cun quatar banchet

sa ripusarian i pensiuna e i veget,

quei ca po no andà ne al mar ne in muntagna

e inveci da piang parche ga toca sta a ca

i so òcc a guardala zampilà

ridarian e cuminciaran a brilà.

E i nostar fiurit ca podan no a

giuga in bagn parche i so mam

a disan ca bagnan gio e fen i dagn,

pudarian pucià  i manit e guardà

ca fen al bagn anca i pasarit

e intanta ca guardan la funtana

a zampilà

a vidarium i so ugit a brilà

E i nostar fio e fradei

men furtuna, quei ca ga disan

i handicapaa,

quant ti porta in gesa e al cimiteri

te da purtai indre,

parche a Pregnana ghe pu nient da vidè.

Fegala la funtana!

E i purtarium a respirà un cicin

d'aria fresca, i fem seta giò

in su una bancheta

e a guardà la funtana a zampilà,

anca i so òcc, anca i so òcc

sarian bun da brilà.

L'altar dì sevum dre a fa un giret

par cercà un pò da fresc,

tutt an bot sum ferma ......

sum resta cunt la boca e i òcc sbareta,

e o pensa, le un miraggio!!

Pian, pian, o pucia dentar una man

gent lo tira fora bagna,

savevi no se piang o se rid,

e o vusa o vusa e men sentù

fina in Paradis,

Mama a Pregnana ghem anca

nunc la Funtana!!

di Rosetta Boniforti

* *

L'eva bela la mia cava

par andà gio ala surgent

gheva un bel santè

cunt una topia d'uga clinta

ca la catevum e la schiscevum cunt i pè,

par fa al bruschet da bev al dì di fest.

Sota la topia al mes da magg

ga marueva i magiostar matt,

a vess sincer savevan da nient

evan propi fat,

ma leva una festa a cercai in mess di frasc.

E i vior? parevan da velù

e ta pò girà tutt i fiurista

ma inscì tan trova pù.

Ma adess ghe pu nient, ne piant ne verd,

en quata sota tuscoss

e forsi ghe sota al còr e i oss di me gent!

Ma sa seri su i òcc,

la vedi anca mo la mia cava

cunt la sua surgent,

e in boca a senti al fa di magiostar,

a senti al prufum di vior da velù,

che insà tan trova pù.

Ma cunsola pena al penser,

che al post dala surgent, farsi

en trua da laurà un pò da gent!!

di Rosetta Boniforti

* * *

Buon Natale, Buon Natale

Mè car Pregnanes

Fermemas on moment,

femas i auguri cont un bell suris

e sarem pussée alégher.

Buon Natale a tutt i autorità

Ca sa den da fa par tucc al paes

E fémigh  "tanti aûguri"

Anca ai nòstar Pret.

Buon Natale a tutt i lauradur

E un auguri ca ga manca mai al laurà

Par pudè purtà sempar la paga in cà.

Buon Natale ai pensionà

Ca godan sempar un bon ripos

E la pension ca sin ben merità.

Buon Natale a tutt i spusit

Cont i so fiurit

Che al Bambin al ga porta i bélee,

ai tusanet un pigottin

e ai mascett un bell cavallin.

Buon Natale e un “grazie”

cont al cour in man, alle badanti

ca curan i nòstar marà

e ca stagan sempar de chi

parchè on dûman gh’hen da curà anca mi.

Buon Natale, Buon Natale

A tucc al Mund

E che al Bambin

Al ma porta ona

PAS

Granda inscì

par tutt i ann ca da vignì.

di Aldo Sioli

La... Pregnana...

Ta seva bela, bruta...vegia e noeva

quanti paes ingir ta disevan insci!...

..Adess ta ghe la scalmana!

Tutt'i bei bosc

ca ta gaveva inturna

cul Vilures e i so canalitt

pien d'acqua neta e bona de bev

de ran, de campé e de pesitt...

...Adess ta ghe la scalmana!

Ghe nasù cume i func

deposit ca spusa

cav de tutt'i culur

vunceria in tutt'i santé

serbatoi de fùm e de vunc!...

...Adess ta ghe la scalmana!

La tua gent, qui noev e qui vecc,

i furestée e l'Autorità Comunal

vusman, scunfian al nas...e

tasan tucc

cume sa fussan adré al toé funeral!!

...Adess ta ghe la scalmana!

Al Nostar Funtanin

di Rosetta Boniforti

I NOSTAR CAMPAN

di Rosetta Boniforti

*

A Pregnana gheva no la Funtana

di Rosetta Boniforti

* * *

La mia cava

di Rosetta Boniforti

* *

Buon Natale

di Rosetta Boniforti

Aldo Sioli

Ricordiamo con affetto il nostro amico Aldo Sioli scomparso martedì 23 gennaio 2007; lo ringraziamo per averci donato la sua magnifica arte

La scalmana

di Aldo Sioli